BESOEK AAN MARGARETHA ACKERMAN
TEHUIS VIR BEJAARDES

PRETORIA WES
 
  Nadat ons in oorvloed kos en kerspakke aan die mense uitgedeel het op die 24ste Desember 2003 was daar nog heelwat verversings oor. Ek en my dogter Monya het Saterdag die 27ste Desember besluit om dit wat oor is na die Margarehta Ackerman Tehuis vir bejaardes in Pretoria Wes te neem!

Ag mense - net wanneer ek dink ek het alles gesien gaan daar weer 'n nuwe deur op 'n skrefie oop en kry mens 'n kykie in heel 'n ander wêreld! 'n Wêreld waarin nie een van ons, ons graag sal wil bevind nie! Hierdie tehuis huisves ± 160 bejaardes.

Daar is ongeveer 80 heel verswakte bejaardes wat nie na hulself kan omsien nie! My hart het uit my keel gespring toe ons in die verswakte saal instap! Oumensies met groot hartseer ogies lê in "cot's" en wanneer jy met hulle gesêls wil hulle nie jou hand los sodat jy na die volgende bed toe kan stap nie!. Hulle begeer persoonlike aandag en liefde!

Na die eerste saal was ek nie seker of ek die ander sale sou kon hanteer nie! - maar ons moes vir almal 'n pakkie koekies, skyfies en 'n paar lekkers uitdeel! ons moes regverdig wees en almal besoek!. Daarna is ons na die psigiatriese saal en weereens kon ons nie ons trane bedwing nie!

Hierdie personeel doen wonderlike werk, hulle praat en behandel die bejaardes met respek en het selfs nog 'n bietjie humor ook! Maar ek kon sien hulle is flou! Van die bejaardes se kinders/familie het belowe hulle kom haal hulle vir Kersfees en het net eenvoudig nie opgedaag nie! - nou moes die personeel boon-op die hartseer probeer verdryf met flou verskonings! Ek haal my hoed af vir hulle! Hier moet ons bietjie vreugde bring!

Ek het belowe dat ons vir hulle in Februarie 'n heerlike braaivleis gaan hou die omies moet help braai en die tannies kan help om die saal mooi te maak! Ons sal vir hulle heerlike slaaie en nog lekkerder nagereg bedien! Ek glo dat oom Andrew weer vir ons musiek sal kom maak en die bejaardes trakteer met musiek uit hul eie era! (Chris Blignaut en die hele lotjie!)
Hy besit die gawe om die bejaardes te betrek by die musiek en kort voor lank sing almal gewoonlik saam en plaas "spesiale versoeke"!

Kom ons gee ons oues van dae 'n heerlike dag vol plesier maar bowenal die wete dat daar mense is wat ook vir hulle omgee en dat hulle altyd baie spesiaal sal bly!

Sal die persone wat belangstel om hiermee te help asook die wat die dag fisies teenwoordig kan wees my asb kontak en laat weet waarmee hulle kan help.

Weereens baie dankie vir al julle onbaatsugtige hulp in die verlede en ek glo dat 2004 nog beter gaan wees!

Vriendelike groete


Elsabe